اداکار ٹائیگر شراف کی گاڑی پر فائرنگ کے معاملے میں گرفتار تینوں ملزمین بالغ ہیں۔ ممبئی پولس نے بتایا کہ دو حملہ آوروں نے اداکار کی گاڑی پر پانچ سے چھ راؤنڈ فائر کیے تھے۔ ایک ملزم کی عمر 18 سال جبکہ دیگر دو کی عمر 22، 22 سال ہے۔ واردات میں استعمال ہونے والی موٹر سائیکل ممبئی کے اندھیری علاقے سے برآمد ہوئی۔ پولس کے مطابق، فائرنگ کے پیچھے مقصد ابھی معلوم نہیں ہوسکا ہے۔

آل انڈیا اسٹوڈنٹس ایسوسی ایشن کی صدر نیہا بورا نے دہلی پولس کے اس نوٹس کو دہلی ہائی کورٹ میں چیلنج کیا ہے جس میں انہیں امن برقرار رکھنے کیلئے 10 ہزار روپے کا ذاتی مچلکہ اور ایک ضامن پیش کرنے کی ہدایت دی گئی ہے۔ تنظیم نے دعویٰ کیا کہ عرضی میں نوٹس پر فوری روک لگانے اور اسے واپس لینے کی درخواست کی گئی ہے۔تنظیم نے الزام لگایا کہ یہ کارروائی پُرامن احتجاج کو روکنے کی کوشش ہے۔

روس کے وزیر خارجہ سرگئی لاوروف نے تہران میں اپنے ایرانی ہم منصب عباس عراقچی سے ملاقات کی۔ دونوں رہنماؤں کے درمیان امریکہ کے ساتھ جنگ اور اسے ختم کرنے کی کوششوں پر بات چیت ہوئی۔ انہوں نے آبنائے ہرمز میں عدم تحفظ کا ذمہ دار امریکہ اور اسرائیل کی فوجی جارحیت کو قرار دیا۔ لاوروف نے ایران کے ساتھ 20 سالہ اسٹریٹجک شراکت داری کے معاہدے کیلئے روس کے عزم کا اعادہ کیا۔

دہلی کے جامع مسجد میٹرو اسٹیشن پر 17 اکتوبر کو ایک مشتبہ شخص بیگ کی جانچ کے دوران اچانک فرار ہوگیا تاہم الرٹ سیکیورٹی اہلکاروں نے اسے تعاقب کرکے پکڑ لیا۔سی آئی ایس ایف کے مطابق سامان کی مزید جانچ میں اس کے زیرجامے کے سلے ہوئے حصے میں ایک نامعلوم نیم ٹھوس مادہ چھپا ہوا ملا۔ ملزم نے خود کو کوالالمپور میں مقیم این آر آئی بتایا۔ اسے مزید تفتیش کیلئے پولس کے حوالے کردیا گیا۔

کاکروچ جنتا پارٹی (CJP) کے رہنماؤں سورَو داس اور آشوتوش رانکا کو پیر کے روز مزید دو دن کیلئے عدالتی حراست میں بھیج دیا گیا۔ دونوں کو مندر مارگ پولس اسٹیشن میں تعینات نئے اسپیشل ایگزیکٹو مجسٹریٹ کے سامنے پیش کیا گیا۔پارٹی نے الزام لگایا کہ ضمانت کی کارروائی میں جان بوجھ کر تاخیر کی جا رہی ہے۔ دونوں رہنماؤں کو بدھ کے روز دوبارہ مجسٹریٹ کے سامنے پیش کیا جائے گا۔

امریکی صدر ڈونلڈ ٹرمپ نے روس سے متعلق متعدد پابندیوں اور ٹیرف کے نفاذ کو عارضی طور پر روک دیا ہے جس سے بھارت اور چین کو ممکنہ طور پر بڑی راحت ملی ہے۔ یہ اقدامات 18 اکتوبر سے نافذ ہونے والے تھے۔ ٹرمپ نے ایگزیکٹو آرڈر میں کہا کہ پابندیوں کو فی الحال روکنا امریکہ کے قومی مفاد میں ہے۔ تاہم یہ فیصلہ ٹیرف کو مستقل طور پر ختم نہیں کرتا۔ ٹرمپ مستقبل میں انہیں نافذ کر سکتے ہیں۔

دہلی ہائی کورٹ نے جمعہ کو 2020 کے شمال مشرقی دہلی فسادات سے متعلق مقدمات میں ضمانت پر باہر موجود نتاشا نروال کو تعلیمی مقاصد کیلئے برطانیہ جانے کی اجازت دے دی۔جسٹس امت بنسل نے ٹرائل کورٹ کو نتاشا کا پاسپورٹ جاری کرنے کی ہدایت دی۔ عدالت نے یہ بھی واضح کیا کہ ان کے خلاف زیر التوا کوئی بھی لک آؤٹ سرکلر (ایل او سی) سفر کے دوران معطل رہے گا۔

سعودی عرب نے اقوام متحدہ کی سلامتی کونسل کی جانب سے حوثیوں کے بڑھتے ہوئے حملوں کی مذمت کا خیرمقدم کیا ہے۔ سعودی وزارت خارجہ نے کہا کہ مملکت کو اپنی سلامتی کیلئے بین الاقوامی قوانین کے تحت دفاع کا حق حاصل ہے۔ سلامتی کونسل نے ریاض کے کنگ خالد انٹرنیشنل ایئرپورٹ پر حملوں کی مذمت کی اور حوثیوں سے شہریوں اور شہری تنصیبات پر حملے فوری روکنے کا مطالبہ کیا۔

دہلی پولس نے جمعہ کودہلی میں ’لہرا دو ترنگا‘ مارچ اور احتجاج کے دوران تقریباً 150 مظاہرین کو حراست میں لے لیا۔ کناٹ پلیس کے سینٹرل پارک کے باہر عام آدمی پارٹی کے رہنماؤں اور کارکنوں نے ترنگا ریلی نکالی، جبکہ آل انڈیا اسٹوڈنٹس ایسوسی ایشن اور بائیں بازو کی جماعتوں نے منڈی ہاؤس کے قریب مظاہرہ کیا۔ مظاہرین نے چیف الیکشن کمشنر گیانیش کمار کے استعفے کا مطالبہ کرتے ہوئے نعرے لگائے۔

دہلی پولس نے جمعہ کو کاکروچ جنتا پارٹی (سی جے پی) کے بانی ابھیجیت دیپکے کو کناٹ پلیس کے سینٹرل پارک میں ترنگا مارچ شروع کرنے سےپہلے حراست میں لے لیا۔ طالبہ رہنما نیہا بورا کو بھی جنتر منتر کے قریب حراست میں لیا گیا۔ پولس نے دیپکے کو حراست سے قبل نوٹس دے کر بتایا تھا کہ علاقے میں دفعہ 163 کے تحت پابندیاں نافذ ہیں اور مارچ کیلئے اجازت نہیں لی گئی ہے۔

اتر پردیش کے میرٹھ کی ایک عدالت نے شوہر امت کشیپ کے قتل کے جرم میں رَویتا اور اس کے پڑوسی امر دیپ کو سزائے موت سنائی ہے۔ عدالت نے جمعہ کو فیصلہ سناتے ہوئے اس معاملے کو ’نایاب ترین جرائم‘ میں شمار کیا۔ رَویتا اور امر دیپ نے مل کر قتل کی سازش رچی اور امت کی موت کو سانپ کے ڈسنے کا واقعہ دکھانے کی کوشش کی۔ موبائل فون ریکارڈ اور پوسٹ مارٹم رپورٹ اہم ثبوت بنے۔

دہلی پولس نے کاکروچ جنتا پارٹی کے 16 اکتوبر کے احتجاج کے پیش نظر صرف 11 افراد کے گروپ کو سینٹرل پارک میں قومی پرچم لہرانے اور قومی ترانہ گانے کی سہولت دینے کی پیشکش کی ہے۔ پولس نے عوام سے احتجاج میں شامل نہ ہونے کی اپیل کی ہے۔ پولس کے مطابق کناٹ پلیس اور آس پاس کے علاقوں میں دفعہ 163 نافذ ہے۔ اس کی خلاف ورزی کرنے والوں کے خلاف قانونی کارروائی کی جا سکتی ہے۔

امریکی صدر ڈونلڈ ٹرمپ نے سابق فوجی ماہرِ نفسیات نڈال حسن کی فائرنگ اسکواڈ کے ذریعے پھانسی کی لائیو نشریات کا منصوبہ منسوخ کر دیا ہے۔ ٹرمپ نے کہا کہ پھانسی طے شدہ شیڈول کے مطابق ہوگی لیکن اسے آن لائن نشر نہیں کیا جائے گا۔ ان کے مطابق کئی لوگ اسے دیکھنا پسند نہیں کریں گے۔ نڈال حسن کو 3 دسمبر 2026 کو فائرنگ اسکواڈ کے ذریعے سزائے موت دی جائے گی۔

یمن میں سعودی قیادت والے فوجی اتحاد نے دعویٰ کیا ہے کہ حوثیوں نے سعودی عرب کے متعدد ہوائی اڈوں، بندرگاہوں اور تیل کی تنصیبات پر حملے کی کوشش کی۔ اتحاد کے مطابق ایران کے حمایت یافتہ حوثی گزشتہ ایک ہفتے سے میزائلوں اور ڈرونز کے ذریعے اہم سعودی مقامات کو نشانہ بنا رہے ہیں۔ اتحاد کے ترجمان ترکی المالکی نے کہا کہ رواں ماہ ریاض کے کنگ خالد انٹرنیشنل ایئرپورٹ پر 20 حملے کیے گئے۔

دہلی ہائی کورٹ نے کاکروچ جنتا پارٹی کو 16 اکتوبر کو کناٹ پلیس کے سینٹرل پارک میں احتجاج کرنے سے روکنے سے انکار کر دیا۔ عدالت نے دہلی پولس کی یقین دہانی ریکارڈ پر لی کہ وہ قانون کے مطابق بھیڑ کو کنٹرول کرنے کیلئے ضروری اقدامات کرے گی۔ دوسری جانب نئی دہلی میونسپل کونسل نے انتظامی وجوہات کا حوالہ دیتے ہوئے 16 اور 17 اکتوبر کو سینٹرل پارک عوام کے لیے بند رکھنے کا اعلان کیا۔

سعودی عرب نے مکہ مکرمہ کی ایک مسجد میں غیر اخلاقی حرکتوں کے الزام میں سزا یافتہ دو بنگلہ دیشی شہریوں کو سزائے موت دے دی۔ سعودی وزارت داخلہ کے مطابق نذیرالاسلام عبدالبصیر اور سیتی اختر کو 14 اکتوبر کو مکہ ریجن میں پھانسی دی گئی۔ وزارت کے مطابق دونوں کو گرفتار کرنے کے بعد تحقیقات کی گئیں اور عدالت نے قصوروار قرار دیتے ہوئے سزائے موت سنائی۔ حکام نے ان کے حرکتوں کی نوعیت ظاہر نہیں کیں۔

اداکار عمران خان کو ممبئی پولس نے 28 اکتوبر تک بھارت چھوڑنے کا نوٹس دیا ہے۔ یہ کارروائی ممبئی میں کاکروچ جنتا پارٹی کے احتجاج میں شرکت کے چند روز بعد کی گئی ہے۔پولس کے مطابق، غیر بھارتی شہری ہونے کے باوجود احتجاج میں شرکت پر کارروائی کی گئی ہے۔ عمران خان 10 اکتوبر کو ممبئی کے آگست کرانتی میدان میں چیف الیکشن کمشنر گیانیش کمار کے خلاف احتجاج میں شریک ہوئے تھے۔

کانگریس رہنماؤں راہل گاندھی اور پرینکا گاندھی نے انڈیا گیٹ کے قریب انکیتا بھنڈاری کے والدین سے ملاقات کی۔ اہل خانہ دشینت کمار گوتم کو سکم کا گورنر مقرر کیے جانے کے خلاف احتجاج کر رہے ہیں۔ انکیتا کے والدین نے صدر دروپدی مرمو سے مطالبہ کیا ہے کہ سی بی آئی کی جاری تحقیقات مکمل ہونے تک تقرری روک دی جائے۔ والدین نے مطالبہ پورا نہ ہونے پر دہرادون میں بھوک ہڑتال کی وارننگ بھی دی ہے۔

اتر پردیش کے میرٹھ میں مرچنٹ نیوی افسر سوربھ راجپوت کے قتل کے معاملے میں مقامی عدالت نے ان کی بیوی مسکان رستوگی اور اس کے عاشق ساحل شکلا کو سزائے موت سنائی ہے۔ دونوں کو دو ہفتے قبل قتل کا مجرم قرار دیا گیا تھا۔ استغاثہ کے مطابق 3 مارچ 2025 کو دونوں نے سوربھ کا قتل کیا اور لاش کے ٹکڑے کرکے نیلے پلاسٹک کے ڈرم میں سیمنٹ، ریت اور پانی بھر کر چھپا دیے۔

سعودی عرب کی کابینہ نے یمن کے حوثی باغیوں کو مملکت پر بار بار حملوں کے نتائج بھگتنے کی وارننگ دی ہے۔ رپورٹ کے مطابق ولی عہد محمد بن سلمان کی صدارت میں ریاض میں کابینہ کا اجلاس ہوا۔ کابینہ نے کہا کہ سعودی عرب اپنی سلامتی کو لاحق خطرات برداشت نہیں کرے گا۔ کابینہ نے حوثیوں سے پیدا ہونے والے خطرات کو ختم کرنے کی کوششوں پر یمنی سرکاری افواج کی بھی تعریف کی۔

لوک سبھا میں قائد حزب اختلاف راہل گاندھی نے انڈیا اتحاد کے رہنماؤں، سماجی کارکنوں اور نوجوان نمائندوں کے ساتھ چائے پر ملاقات کی۔ اجلاس میں چیف الیکشن کمشنر خلاف احتجاج جاری رکھنے اور تحریک کو وسیع کرنے کی حکمت عملی پر تبادلہ خیال کیا گیا۔ ملاقات میں جنتر منتر پر احتجاج بحال کرنے کی تجویز اہم رہی۔ یوگیندر یادو نے اس ملاقات کو جمہوریت کے تحفظ کی تحریک کیلئے اہم موڑ قرار دیا۔

ورلڈ بینک کے 2026 کے غربت و عدم مساوات پلیٹ فارم کے مطابق بعض امیر ممالک کے غریب ترین 10 فیصد افراد کی یومیہ آمدنی یا کھپت کی سطح بھی بھارت کے امیر ترین 10 فیصد افراد سے زیادہ ہے۔ رپورٹ کے مطابق بھارت میں امیر ترین 10 فیصد کیلئے یہ حد تقریباً 10 ڈالر روزانہ ہے جبکہ امریکہ میں یہ 173 ڈالر، کناڈا اور آسٹریلیا میں 129 ڈالر اور جرمنی میں 128 ڈالر ہے۔

دہلی پولس نے جنتر منتر کو احتجاجی مظاہروں کے لیے مقررہ مقام کی فہرست سے خارج کر دیا ہے۔ پولس کمشنر انوراگ کمار کے دستخط شدہ حکم کے تحت تین متبادل مقامات مقرر کیے گئے ہیں۔ نئے مقامات پر مظاہروں کے لیے الگ ضابطۂ کار جاری کیا جائے گا۔ پولس نے رام لیلا میدان، بُراری میدان اور سی بی ڈی میدان کو احتجاج کیلئے نامزد کیا ہے۔ اس پر اب تک اپوزیشن نے کوئی رد عمل نہیں دیا ہے۔

دہلی میں انڈیا اتحاد کے ہزاروں حامیوں نے مبینہ ’ووٹ چوری‘ اور انتخابی بے ضابطگیوں کے خلاف احتجاجی مارچ کیا۔ راہل گاندھی نے پرینکا گاندھی اور اے آئی ایس اے کی سربراہ نیہا بورا کے ساتھ مارچ کی قیادت کی۔ راہل گاندھی خصوصی گہری نظرثانی (SIR) پر عبوری روک لگانے کی درخواست کے سلسلے میں سپریم کورٹ پہنچے۔ راہل گاندھی نے کہا کہ آئین اور جمہوریت کے تحفظ کیلئے احتجاج جاری رہے گا۔

چیف جسٹس آف انڈیا سوریہ کانت نے نئی دہلی میں نیشنل ہیومن رائٹس کمیشن کے 33ویں یوم تاسیس کی تقریب سے خطاب کرتے ہوئے کہا ’’جینے کے حق میں، آلودگی سے پاک پانی اور ہوا کا حق بھی شامل ہے۔ چیف جسٹس سوریہ کانت نے حکومتوں اور انسانی حقوق کے پینلز پر زور دیا کہ وہ نظام کی خامیوں کو دور کرنے اور سب سے کمزور افراد کے حقوق کے تحفظ کے لیے مربوط کارروائی کریں۔

سعودی عرب کے دارالحکومت ریاض کے بین الاقوامی ہوائی اڈے پر ہفتے کو حوثی باغیوں کے حملے میں کم از کم 12 افراد ہلاک اور 309 زخمی ہوگئے۔ سعودی حکام کے مطابق ہلاک شدگان میں سعودی شہریوں کے علاوہ بنگلہ دیش، امریکہ، اردن، فلسطین، شام، سوڈان اور مصر کے شہری بھی شامل ہیں۔ حوثیوں نے حملے کی ذمہ داری قبول کی ہے۔ حملے کے بعد ہوائی اڈے کی سرگرمیاں عارضی طور پر معطل کردی گئیں۔

اتر پردیش کے لکھنؤ میں 28 سالہ کیفے مالک شیوا شرما کی بالکونی سے گرنے کے بعد موت ہوگئی۔ ان کی والدہ رنجنا شرما نے سوشل میڈیا انفلوئنسر گرل فرینڈ شردھا دوبے پر بلیک میلنگ، دھمکیاں دینے اور جسمانی تشدد کے الزامات لگائے ہیں۔ پولس نے معاملے میں قتل کا مقدمہ درج کیا ہے۔ شکایت کے مطابق شردھا مبینہ طور پر شیوا کی قابل اعتراض ویڈیوز عام کرنے کی دھمکی دیتی تھی۔

اسپیس ایکس کے سربراہ ایلون مسک نے اسٹارلنک کی بھارت میں آمد کے معاملے پر مکیش امبانی کو پھر نشانہ بنایا ہے۔ اتوار کو سوشل میڈیا پلیٹ فارم ایکس پر مسک نے موجودہ مارکیٹ کا دفاع کرنے والوں کو ’’امبانی کی انٹرنیٹ حامی فوج‘‘ قرار دیتے ہوئے ان کے دلائل کو مضحکہ خیز منافقت کہا۔مسک کا کہنا ہے کہ اسٹارلنک سے مقابلہ بڑھنے پر صارفین کو زیادہ انتخاب ملے گا۔

دہلی کی ایک مقامی عدالت نے کاکروچ جنتا پارٹی (سی جے پی) کے رہنماؤں ابھیجیت دیپکے، سورَو داس اور آشوتوش رانکا کو ایک سال تک امن خراب کرنے والی کسی سرگرمی میں ملوث نہ ہونے کی شرط پر رہا کر دیا۔ تینوں کو ہفتے کو دہلی پہنچنے کے بعد طیارے سے حراست میں لیا گیا تھا۔ ہفتے کو تین ہزار سے زائد مظاہرین کو بھی حراست میں لینے کے بعد رہا کر دیا گیا تھا۔

کانگریس رہنما کے سی وینوگوپال نے شہریوں سے پیر کو دہلی میں بڑے احتجاجی مارچ میں شامل ہونے کی اپیل کی ہے۔ یہ مارچ سرکار پر لگائے گئے ملک گیر ’ووٹ چوری‘ کے الزامات کے خلاف ہوگا۔ وینوگوپال کے مطابق انڈیا اتحاد کے ارکان پارلیمنٹ، رہنما اور کارکنان مارچ میں شرکت کریں گے۔ رہنماؤں کا ایک وفد سی جے آئی کو میمورنڈم پیش کرکے موجودہ بحران میں عدالتی مداخلت کی درخواست بھی کرے گا۔

کانگریس رہنما راہل گاندھی نے ہفتے کو دہلی میں الیکشن کمیشن کے خلاف احتجاج کے دوران پولس کارروائی پر وزیر اعظم نریندر مودی، وزیر داخلہ امت شاہ اور چیف الیکشن کمشنر گیانیش کمار کو نشانہ بنایا۔ سوشل میڈیا پلیٹ فارم ایکس پر راہل گاندھی نے لکھا کہ وہ ایک دہائی سے زیادہ عرصے سے مودی اور آر ایس ایس کے خلاف لڑ رہے ہیں۔ راہل گاندھی نے نوجوانوں سے کہا کہ وہ ان کے ساتھ کھڑے ہیں۔

دہلی میں ہفتہ کو چیف الیکشن کمشنر گیانیش کمار کے خلاف احتجاج کے دوران اپوزیشن کے چار سابق وزرائے اعلیٰ کو حراست میں لے لیا گیا۔ ان میں ممتا بنرجی، اروند کیجریوال، پنارائی وجین اور مانک سرکار شامل ہیں۔ ممتا بنرجی کو ترنمول کانگریس کے ارکان پارلیمنٹ کے ساتھ ساؤتھ ایونیو میں روکے جانے کے بعد حراست میں لیا گیا۔ اپوزیشن نے انتخابی بے ضابطگیوں اور گیانیش کمار کے خلاف کارروائی کا مطالبہ کیا۔

ایلون مسک نے ایکس پر اپنی تازہ پوسٹ میں مکیش امبانی سے متعلق میڈیا رپورٹس کے اسکرین شاٹس شیئر کیے ہیں۔ ان رپورٹس میں مبینہ طور پر کہا گیا ہے کہ ریلائنس سے منسلک ایک فرم نے سوشل میڈیا پر بی جے پی کی انتخابی مہموں کو فروغ دیا۔ مسک کے دوسرے اسکرین شاٹ میں ریلائنس سے منسلک ایک کمپنی کے، بی جے پی کو بڑے سیاسی عطیات دینے کا دعویٰ کیا گیا ہے۔

وزارت داخلہ نے تمام ریاستوں اور مرکز کے زیر انتظام علاقوں کو ہدایت کی ہے کہ وہ آج جنتر منتر پر کاکروچ جنتا پارٹی کے احتجاج کے لیے دہلی کی طرف کوچ کرنے والے لوگوں کو روکنے کے لیے فوری حفاظتی اقدامات کریں۔ اس کے علاوہ ریاستی اور مرکز کے زیر انتظام انٹیلی جنس ایجنسیوں، سرحدی ٹرانزٹ حکام اور دہلی پولیس کو مسلسل معلومات کا تبادلہ برقرار رکھنے کی ہدایت کی گئی ہے۔

سی جے پی کے بانی ابھیجیت دیپکے اور دیگر رہنماؤں سوربھ داس، آشوتوش رانکا کو دہلی میں حراست میں لے لیا گیا ہے۔ کاکروچ جنتا پارٹی نے اس کے بعد اعلان کیا ہے کہ قیادت کی گرفتاری کے باوجود نوجوانوں کا احتجاج جاری رہے گا۔ میڈیا رپورٹس کے مطابق اس دوران مرکزی دہلی کے جنتر منتر اور اس کے قریبی علاقوں سے بڑی تعداد میں مظاہرین کو بسوں میں بٹھا کر ہٹایا جا رہا ہے۔

دہلی پولس نے چیف الیکشن کمشنر گیانیش کمار کے خلاف احتجاج سے قبل جن پتھ اور کرتویہ پتھ کے سنگم کے چار کلومیٹر دائرے میں موبائل انٹرنیٹ خدمات 24 گھنٹے کے لیے معطل کرنے کا حکم دیا ہے۔ یہ پابندی جمعہ رات 10 بجے سے ہفتہ رات 10 بجے تک نافذ رہے گی۔ اس کے علاوہ دہلی میٹرو نے 57 میٹرو اسٹیشنوں کو آج رات 9 بجے سے اگلے اعلان تک بند کر دیا ہے۔