آئی پی ایل 2025 کے اہم میچ میں لکھنؤ سپر جائنٹس نے سن رائزرز حیدرآباد کے خلاف 205 رنز بنائے۔ نکولس پورن نے آخری کے اوورز میں 45 رنز بنا کر ٹیم کو مضبوط اختتام دیا۔ اس سے قبل مارکرم (61) اور مچل مارش (65) نے شاندار نصف سنچریاں اسکور کیں۔ کپتان رشبھ پنت ایک بار پھر صرف 7 رنز بنا کر آؤٹ ہو گئے۔ لکھنؤ کو پلے آف میں جگہ بنانے کے لیے تمام میچز جیتنے ہیں۔

الہ آباد ہائی کورٹ نے اتر پردیش کے سنبھل ضلع میں واقع شاہی جامع مسجد کے سروے کے ٹرائل کورٹ کے حکم کو برقرار رکھا۔ مسلم فریق کی طرف سے دائر کی گئی درخواست ’ٹرائل کورٹ کے حکم سے کوئی مسئلہ‘ نہ ملنے کے بعد مسترد کر دیا گیا۔ فیصلے پر ردعمل ظاہر کرتے ہوئے وکیل وشنو شنکر جین نے کہا کہ مقدمے پر روک ختم کرنے کے فیصلے کا مطلب ہے کہ قانونی کارروائی اب جاری رہے گی۔

آسام کے چرائیدیو ضلع کی ایک عدالت نے 23 افراد کو 13 سال قبل جادو ٹونے کے شبہ میں ایک خاتون کو قتل کرنے کے جرم میں عمر قید کی سزا سنائی ہے۔ رپورٹ کے مطابق چرائیدیو کے ڈسٹرکٹ اینڈ سیشن جج ابوبکر صدیق نے فیصلہ سناتے ہوئے 12 مردوں اور 11 خواتین کو جرم کا مرتکب قرار دیتے ہوئے عمر قید کی سزا سنائی اور ساتھ ہی ہر ایک کو 5 ہزار روپے جرمانے کی سزا بھی سنائی۔

بی جے پی لیڈر اور یوٹیوبر منیش کشیپ پر پٹنہ میڈیکل کالج اینڈ اسپتال (PMCH) کے ڈاکٹروں نے مبینہ طور پر حملہ کیا۔ رپورٹ کے مطابق کشیپ کو تقریباً تین گھنٹے تک اسپتال کے اندر ایک کمرے میں قید رکھا گیا اور جھگڑے کے بعد اس کا موبائل فون ضبط کرلیا گیا۔ تین گھنٹے کی حراست کے بعد کشیپ پی ایم سی ایچ سے باہر نکلا جس کے چہرے پر زخم نظر آئے۔

آئی پی ایل 2025 میں آج لکھنؤ سپر جائنٹس کے خلاف سن رائزرز حیدرآباد کے کپتان پیٹ کمنز نے ٹاس جیت کر گیند بازی کرنے کا فیصلہ کیا۔ ایل ایس جی کے لیے یہ میچ انتہائی اہم ہے کیونکہ پلے آف میں رسائی کی امید برقرار رکھنے کے لیے اسے ہر حال میں جیتنا ہوگا۔ ایس آر ایچ پلے آف کی دوڑ سے باہر ہو چکی ہے اور آسٹریلوی اوپنر ٹراوس ہیڈ کی غیر موجودگی ٹیم کے لیے چیلنج ہے۔

اسرائیل نے دو ماہ کی مکمل ناکہ بندی کے بعد غزہ میں ’بنیادی خوراک‘ کے داخلے کی اجازت دینے کا اعلان کر دیا ہے۔ وزیر اعظم نیتن یاہو کے دفتر نے کہا کہ بھوک کا بحران فوجی کارروائی کو نقصان پہنچا سکتا ہے۔ اقوام متحدہ خوراک و ادویات کی شدید قلت پر پہلے ہی خبردار کر چکی ہے۔ اسرائیل اور حماس کے درمیان قطر میں قیدیوں کی رہائی اور جنگ بندی پر بالواسطہ مذاکرات جاری ہیں۔

ممبئی پولس نے دہشت گردی سے نمٹنے اور انٹیلی جنس نظام کو مؤثر بنانے کے لیے نئی انٹیلی جنس ونگ قائم کی ہے جس کی سربراہی 2006 بیچ کی آئی پی ایس افسر ڈاکٹر آرٹی سنگھ کریں گی۔ وہ شہر کی پہلی جوائنٹ کمشنر آف پولس (انٹیلی جنس) مقرر ہوئی ہیں۔ اس نئی ونگ کا مقصد خفیہ معلومات کا بروقت تجزیہ اور عملدرآمد یقینی بنانا ہے۔ خصوصی برانچ اب براہ راست انٹیلی جنس کمشنر کو رپورٹ کرے گی۔

سپریم کورٹ نے مدھیہ پردیش کے وزیر وجے شاہ کی معافی مسترد کر دی جو انہوں نے آپریشن سندور کے بعد خاتون فوجی افسر کے خلاف توہین آمیز اور فرقہ وارانہ ریمارکس پر دی تھی۔ جسٹس سوریہ کانت نے کہا ’’کبھی کبھی لوگ صرف کارروائی سے بچنے کے لیے نرم زبان استعمال کرتے ہیں اور مگرمچھ کے آنسو بہاتے ہیں۔‘‘ عدالت نے کہا کہ عوامی نمائندوں کو ذمہ داری سے بات کرنی چاہیے۔

اسرائیل نے شام میں ایک خفیہ آپریشن کے بعد ملک کے مشہور ترین جاسوس سے تعلق رکھنے والی ہزاروں اشیاء کو بازیاب کر لیا ہے۔ نیتن یاہو نے یہ اشیاء کوہن کی بیوہ نادیہ کو دکھائیں۔ یہ سامان کوہن کی گرفتاری کے بعد شامی انٹیلی جنس کے قبضے میں تھا جس میں ذاتی خطوط، جعلی شناختی دستاویزات، تصاویر اور مشنز سے متعلق ریکارڈ شامل ہے۔ ایلی کوہن کو 1965 میں دمشق میں سرِ عام پھانسی دی گئی تھی۔

ترنمول کانگریس کا کوئی رکن حکومت کے کثیر الجماعتی عالمی مشن میں شامل نہیں ہوگا۔ رپورٹ کے مطابق ایم پی یوسف پٹھان وفد کا حصہ بن سکتے تھے تاہم اب پارٹی نے شرکت سے انکار کر دیا ہے۔ یہ وفد 30 سے زائد ممالک میں دہشت گردی کے خلاف بھارت کا مؤقف پیش کرے گا۔ ترنمول نے کہا کہ خارجہ پالیسی مرکزی حکومت کا دائرہ اختیار ہے اور اسی کو ذمہ داری اٹھانی چاہیے۔

سابق امریکی صدر جو بائیڈن میں خطرناک نوعیت کے پروسٹیٹ کینسر کی تشخیص ہوئی ہے جو ہڈیوں تک پھیل چکا ہے۔ 82 سالہ بائیڈن کو پیشاب کی علامات کے بعد یہ بیماری معلوم ہوئی۔ ان کے دفتر کے مطابق کینسر ہارمون کے زیر اثر ہے جس کے باعث اس کا علاج ممکن ہے۔ بائیڈن اور ان کے اہل خانہ علاج کے مختلف امکانات پر غور کر رہے ہیں۔ ٹرمپ نے ان کے لیے نیک خواہشات کا اظہار کیا ہے۔

آئی پی ایل 2025 کے پلے آف میں گجرات ٹائٹنز، رائل چیلنجرز بنگلور اور پنجاب کنگز نے جگہ بنالی ہے۔ اتوار کی رات دہلی کیپیٹلز کے خلاف گجرات کی جیت کے بعد تین ٹیمیں یقینی طور پر پلے آف میں پہنچ گئیں۔ اب صرف ایک جگہ باقی ہے جس کے لیے دہلی، ممبئی انڈینز اور لکھنؤ سپر جائنٹس کے درمیان مقابلہ ہے۔ پنجاب کنگز نے پہلی بار 2014 کے بعد پلے آف میں جگہ بنائی ہے۔

بھارتی کرکٹ بورڈ مبینہ طور پر ایشیا کپ 2025 سے علیحدگی کا فیصلہ کر سکتی ہے۔ رپورٹ کے مطابق بی سی سی آئی نے ایشین کرکٹ کونسل کو زبانی طور پر فیصلے سے آگاہ کیا ہے کیونکہ اے سی سی کے سربراہ پاکستانی وزیر محسن نقوی ہیں۔ بی سی سی آئی کا کہنا ہے کہ حکومت ہند سے مشاورت جاری ہے۔ بی سی سی آئی کے اس فیصلے سے ایشیا کپ کی مالی حیثیت بھی متاثر ہو سکتی ہے۔

مدھیہ پردیش کے بھوپال میں 14 مئی کو گوتم نگر میں شیوم نامی نوجوان کو مبینہ طور پر ایک لڑکی سے دوستی کی کوشش پر قتل کر دیا گیا۔ رپورٹ کے مطابق لڑکی کا سابق محبوب، شیوا راجپوت، شِوم کی دلچسپی پر ناراض تھا۔ جھگڑے کے بعد شیوا نے تیز دھار ہتھیار سے حملہ کیا جس سے شیوم زخمی ہو گیا اور علاج کے دوران دم توڑ گیا۔ پولیس نے شیوا کو گرفتار کر لیا ہے۔

حیدرآباد میں اتوار کو ایک بڑی دہشتگردی کی کوشش ناکام بنا دی گئی۔ پولس نے دو مشتبہ افراد، سراج الرحمان اور سید سمیر کو گرفتار کیا جو مبینہ طور پر سعودی عرب میں موجود داعش کے نیٹ ورک سے منسلک تھے۔ آندھرا پردیش اور تلنگانہ پولس کی مشترکہ کارروائی میں دھماکہ خیز مواد برآمد کیا گیا۔ گرفتار افراد کے قبضے سے امونیا، سلفر اور ایلومینیم پاؤڈر ملا۔ دونوں افراد پولس کی حراست میں ہیں۔

اتر پردیش اے ٹی ایس نے رام پور کے رہائشی شہزاد کو پاکستان کی انٹرسروسز انٹیلیجنس (آئی ایس آئی) کے لیے مبینہ جاسوسی کے الزام میں مرادآباد سے گرفتار کر لیا۔ حکام کے مطابق شہزاد پاکستان کے کئی دورے کر چکا ہے اور سرحد پار اسمگلنگ کی آڑ میں حساس معلومات فراہم کرتا رہا۔ اس پر آئی ایس آئی ایجنٹس سے رابطے، بھارتی سم کارڈز اور فنڈز فراہم کرنے اور دیگر افراد کو پاکستان بھجوانے کے الزامات بھی ہیں۔

اشوکا یونیورسٹی کے ایسوسی ایٹ پروفیسر علی خان محمود آباد کو آپریشن سندور کے بارے میں سوشل میڈیا پر پوسٹ کرنے پر گرفتار کیا گیا ہے۔ یہ کارروائی بی جے پی یووا مورچہ کے ایک لیڈر کی شکایت پر کی گئی۔ یہ گرفتاری ہریانہ کے ریاستی کمیشن برائے خواتین کی جانب سے ایسوسی ایٹ پروفیسر کو ان کے آپریشن سندور ریمارکس پر نوٹس بھیجے جانے کے چند دن بعد ہوئی ہے۔

آئی پی ایل 2025 کے میچ میں دہلی کیپیٹلز نے گجرات ٹائٹنز کے خلاف 199 رنز کا بڑا ہدف کھڑا کر دیا۔ کے ایل راہل نے 112 رنز کی ناقابل شکست اننگز کھیلی جس میں 14 چوکے اور 4 چھکے شامل تھے۔ راہل نے ابیشیک پوریل (30 رنز) کے ساتھ دوسری وکٹ کے لیے 90 رنز کی شراکت داری قائم کی۔ راہل نے ویراٹ کوہلی کا ریکارڈ توڑ کر سب سے کم اننگز میں 8000 ٹی ٹوئنٹی رنز مکمل کیا۔

چھتیس گڑھ کے دھمتری ضلع میں ایک 30 سالہ شخص کی بجلی گرنے سے اس وقت موت ہو گئی جب وہ فون پر بات کر رہا تھا۔ اسے قریبی اسپتال لے جایا گیا جہاں ڈاکٹروں نے اس کے زخموں کی سنگینی کو دیکھتے ہوئے اسے ضلع اسپتال ریفر کردیا۔ تاہم وہ راستے میں ہی زخموں کی تاب نہ لاتے ہوئے چل بسا۔ موبائل فون میں مقناطیسی اجزا ہوتے ہیں جو کہ آسمانی بجلی کو اپنی طرف متوجہ کرتے ہیں۔

مہاراشٹر کے سولاپور ضلع میں ایک فیکٹری میں زبردست آگ لگنے سے 3 خواتین اور ایک بچے سمیت 8 افراد ہلاک ہو گئے۔ رپورٹ کے مطابق سولاپور MIDC میں اکل کوٹ روڈ پر واقع سینٹرل ٹیکسٹائل ملز میں صبح سرکٹ میں شارٹ لگنے سے آگ بھڑک اٹھی۔ آگ کی شدت کے باعث فائر بریگیڈ کے عملے کو بھڑکتی ہوئی آگ پر قابو پانے میں پانچ سے چھ گھنٹے لگے۔ مرنے والوں میں فیکٹری کا مالک بھی شامل ہے۔

آل انڈیا مجلس اتحاد المسلمین کے سربراہ اسد الدین اویسی نے کہا ’’بی جے پی اقتدار میں آ رہی ہے کیونکہ اپوزیشن ناکام ہے۔ وہ انتخابات جیت رہی ہے کیونکہ اس نے تقریباً 50 فیصد ہندو ووٹوں کو اکٹھا کر لیا ہے۔‘‘ انہوں نے کہا کہ ان پر ’بی ٹیم‘ ہونے کا الزام اپوزیشن کی طرف سے صرف نفرت کا اظہار ہے۔ اویسی نے مزید کہا کہ ان کی پارٹی صرف چند سیٹوں پر انتخابات لڑتی ہے۔

امریکہ کی ایک وفاقی عدالت نے بھارتی پی ایچ ڈی طالبہ پریا سکسینہ کو ملک بدری سے تحفظ دیتے ہوئے محکمہ داخلہ کی کارروائی کو غیرقانونی قرار دے دیا۔ پریا، جنہوں نے حال ہی میں جنوبی ڈکوٹا اسکول آف مائنز اینڈ ٹیکنالوجی سے ڈاکٹریٹ مکمل کی، کو ایک معمولی ٹریفک خلاف ورزی پر ویزا منسوخی کا سامنا تھا۔ عدالت نے فوری طور پر عارضی حکم امتناع جاری کیا جس سے انہیں تعلیم مکمل کرنے کی اجازت ملی۔

آئی پی ایل 2025 کے اہم میچ میں پنجاب کنگز نے راجستھان رائلز کو 10 رنوں سے شکست دے دی۔ پنجاب کی جانب سے نہال وادھیرا نے 37 گیندوں پر 70 رنز کی جارحانہ اننگز کھیلی۔ پنجاب نے 20 اوورز میں 219 رنز بنائے۔ جواب میں راجستھان کی ٹیم 20 اوورز میں 7 وکٹ کے نقصان پر 209 رنز ہی بنا سکی۔ یشسوی جیسوال نے 50، دھرو جریل نے 52 اور ویبھو سوریاونشی نے 40 رنوں کی اننگز کھیلیں۔

آئی پی ایل 2025 کے اہم مقابلے میں آج دہلی کیپٹلز کے خلاف گجرات ٹائٹنز کے کپتان شبمن گل نے ٹاس جیت کر فیلڈنگ کا فیصلہ کیا ہے۔ دہلی کی ٹیم میں مادھو تیواری کی جگہ وپرج نگم اور مچل اسٹارک کی جگہ مستفیض الرحمٰن کو جگہ دی گئی ہے۔ گجرات کی ٹیم میں کگیسو رباڈا کی واپسی ہوئی ہے۔ دہلی کی ٹیم 11 پوائنٹس کے ساتھ 5ویں نمبر پر ہے وہیں گجرات نمبر 2 پر براجمان ہے۔

بھارت میں تین بڑے دہشتگرد حملوں کا مرکزی ملزم اور لشکر طیبہ کا اعلیٰ کمانڈر سیف اللہ خالد پاکستان کے صوبہ سندھ میں ہلاک ہو گیا۔ رپورٹ کے مطابق اسے نامعلوم افراد نے نشانہ بنایا۔ خالد تین بڑے حملوں میں ایک اہم سازشی تھا: 2005 میں بنگلور میں انڈین سائنس کانگریس (ISC) حملہ، 2006 میں ناگپور میں راشٹریہ سویم سیوک سنگھ (RSS) کے ہیڈکوارٹر پر حملہ اور 2008 میں رام پور میں CRPF کیمپ پر حملہ۔

حیدرآباد کے تاریخی چارمینار کے قریب ایک عمارت میں صبح شدید آگ لگنے سے کم از کم 17 افراد جاں بحق ہو گئے۔ فائر بریگیڈ کو صبح ساڑھے 6 بجے اطلاع ملی جس پر فوری کارروائی کی گئی۔ آگ لگنے کی اصل وجہ معلوم نہیں ہو سکی تاہم شبہ ظاہر کیا جا رہا ہے کہ شارٹ سرکٹ سبب بن سکتا ہے۔ مرکزی وزیر جی کشن ریڈی اور وزیر اعلیٰ ریونت ریڈی نے واقعے پر افسوس کا اظہار کیا ہے۔

غزہ میں شدید بمباری کے دوران اسرائیل اور حماس کے درمیان جنگ بندی مذاکرات ہفتے کو قطر میں دوبارہ شروع ہو گئے۔ فلسطینی حکام کے مطابق پچھلے 72 گھنٹوں میں اسرائیلی حملوں میں کم از کم 146 افراد جاں بحق ہو چکے ہیں جبکہ سینکڑوں زخمی اور درجنوں ملبے تلے دبے ہوئے ہیں۔ اسرائیل کی فوج نے کہا کہ وہ غزہ کے کچھ حصوں میں ’آپریشنل کنٹرول‘ حاصل کرنے کے مقصد سے وسیع حملے کر رہی ہے۔

بھارت اور پاکستان کے درمیان 12 مئی کو طے پانے والی جنگ بندی جاری رہے گی۔ ایک فوجی ترجمان نے اتوار کو کہا کہ جنگ بندی کے ختم ہونے کی افواہوں میں کوئی صداقت نہیں۔ رپورٹ کے مطابق ایک فوجی اہلکار نے کہا ’’جہاں تک ڈی جی ایم اوز (ڈائریکٹر جنرل آف ملٹری آپریشنز) کی بات چیت کے دوران طے شدہ دشمنی میں وقفے کے تسلسل کا تعلق ہے، اس کی کوئی ختم ہونے کی تاریخ نہیں ہے۔‘‘

ہریانہ کے نوح ضلع میں ایک 26 سالہ شخص کو پاکستان کے لیے جاسوسی کے الزام میں گرفتار کیا گیا۔ رپورٹ کے مطابق نوح پولس نے بتایا کہ ملزم ارمان کو ہفتہ کو دہلی میں پاکستانی ہائی کمیشن میں تعینات ایک ملازم کے ذریعے بھارتی فوج اور دیگر عسکری سرگرمیوں سے متعلق معلومات پاکستان کے ساتھ شیئر کرنے پر گرفتار کیا گیا تھا۔ مقامی عدالت نے ارمان کو چھ روزہ پولیس ریمانڈ پر بھیج دیا ہے۔

انڈین اسپیس ریسرچ آرگنائزیشن (ISRO) نے پولر سیٹلائٹ لانچ وہیکل (PSLV-C61) پر سوار اپنا 101 واں سیٹلائٹ EOS-09 لانچ کیا لیکن یہ چند منٹ بعد ناکام ہوگیا۔ خلائی ایجنسی نے ایکس پر ایک پوسٹ میں کہا، ’’آج 101 ویں لانچ کی کوشش کی گئی، PSLV-C61 کی کارکردگی دوسرے مرحلے تک نارمل تھی۔ تیسرے مرحلے میں مشاہدے کی وجہ سے، مشن کو پورا نہیں کیا جا سکا۔‘‘ ISRO نے تحقیقات کا اعلان کیا ہے۔

دہلی میں عام آدمی پارٹی (AAP) کے 15 میونسپل کونسلرز نے پارٹی سے استعفیٰ دے کر ایک نئی سیاسی جماعت ’اندرپرستھ وکاس پارٹی‘ بنانے کا اعلان کیا۔ بغاوت کی قیادت مکیش گوئل کر رہے ہیں جو ایم سی ڈی میں AAP کے لیڈر آف دی ہاؤس تھے۔ باغی کونسلرز میں ہیماچند گوئل، ہیمانی جین، رناکشی شرما، اور دیگر شامل ہیں۔ ان میں کئی رہنما سابقہ کانگریس کے رکن رہ چکے ہیں۔

آئی پی ایل 2025 کے تحت رائل چیلنجرز بنگلور اور کلکتہ نائٹ رائیڈرز کے درمیان میچ ایم چناسوامی اسٹیڈیم میں شیڈول ہے لیکن شدید بارش کے باعث ٹاس میں تاخیر ہو گئی ہے۔ اگرچہ بارش کی شدت میں کمی آئی ہے اور اسٹیڈیم کے ڈرینیج سسٹم کی بدولت میچ کے انعقاد کی امید باقی ہے لیکن اگر مزید تاخیر ہوئی تو 8:45 بجے سے اوورز کم ہونا شروع ہو جائیں گے۔

آندھرا پردیش کے کاکیناڈا ضلع میں تونی کے قریب نیشنل ہائی وے پر ایک تیز رفتار کار کھڑی لاری سے ٹکرا گئی جس کے نتیجے میں تین افراد موقع پر جاں بحق اور دو زخمی ہو گئے۔ رپورٹ کے مطابق حادثے کا شکار تمام افراد راجمنڈری میں اپولو فارمیسی کے ملازم تھے۔ گاڑی بے قابو ہو کر سڑک کنارے کھڑے ٹرک سے ٹکرا گئی۔ زخمی افراد کو قریبی اسپتال میں داخل کرا دیا گیا ہے۔

ٹریولر یوٹیوبر جیوتی ملہوترا عرف جیوتی رانی کو بھارتی فوجی معلومات پاکستان کو دینے کے الزام میں ہریانہ کے حصار سے گرفتار کیا گیا۔ وہ ان چھ لوگوں میں شامل ہے جنہیں ان الزامات میں گرفتار کیا گیا ہے۔ رپورٹ کے مطابق ملزمہ نے پاکستانی ہائی کمیشن کے اہلکار احسان الرحیم سے ملاقات کے بعد دو بار پاکستان کا سفر کیا اور حساس معلومات واٹس ایپ، ٹیلیگرام اور اسنیپ چیٹ کے ذریعے شیئر کیں۔

اسرائیلی فوج نے غزہ میں نئے فوجی آپریشن ’گیڈیونز چیریٹس‘ کے ابتدائی مرحلے کا آغاز کر دیا۔ فوج کے مطابق گزشتہ 24 گھنٹوں میں 150 سے زائد اہداف کو نشانہ بنایا گیا جبکہ غزہ کے ریسکیو حکام نے 100 شہریوں کی ہلاکت کی تصدیق کی ہے۔ اسرائیل کا کہنا ہے کہ آپریشن کا مقصد حماس کی شکست اور مغویوں کی رہائی ہے۔ اقوام متحدہ کے انسانی حقوق کمشنر نے حملوں کو بین الاقوامی قوانین کے خلاف قرار دیا ہے۔

اترپردیش کے ضلع شراوستی میں ایک 31 سالہ شخص نے بیوی کو قتل کرنے کے بعد لاش کے ٹکڑے کر کے مختلف مقامات پر پھینک دیے۔ پولس کے مطابق ملزم سیف الدین نے اپنی بیوی سبینہ کو قتل کیا اور لاش کو کاٹ کر کچھ حصے نہر میں جبکہ باقی 10 کلومیٹر کے دائرے میں پھینک دیے۔ رپورٹ کے مطابق تفتیش کے بعد مجرم نے جرم قبول کر لیا۔ جہیز کے مطالبے کو قتل کی وجہ بتایا جا رہا ہے۔